આંખો ખૂલે છે પુરી ઉંઘ લઈને કે

આંખો ખૂલે છે પુરી ઉંઘ લઈને કે

    સૂણી ફિલ્મ ગીતો સવારે સવારે

 

ઉઠોછો પ્રભાતે કરી હાથ દર્શન કે

    શોભે છે ચા કપ સવારે સવારે

 

બોલો છો મીઠાં વચન પ્રેમથી કે

    ક્રોધે બકો છો સવારે સવારે

 

ગંગા ને યમુનાને સ્નાને સ્મરો છો કે

    ઢોળો છો લોટા સવારે સવારે

 

બની સ્વચ્છ મુખથી પ્રભુને ભજો છો કે

    પેપર પઢો છો સવારે સવારે

 

પ્રેમે નમો છો માતા પિતાને કે

    કજિયા કરો છો સવારે સવારે

 

કામે ચઢો છો નવી તાજગી લઈ કે

    સુણી મિલની વ્હિસલ સવારે સવારે

 

વદન પર ખુશાલીનાં પુષ્પો ખીલે છે કે

    રડતો છે ચહેરો સવારે સવારે

    ===ૐ===