Tag Archives: પૂજા

આનંદે નાચતો નિવાસ.

સામાન્ય

ઊર્મિની ઈંટોથી સર્જ્યો આવાસ મેં,

આનંદે નાચતો કીધો નિવાસ મેં.

 

સંતાનોને સંતની મેં દિશા ચીંધી,

સંસ્કાર ઉપવીતની દીક્ષા છે દીધી,

બુદ્ધિની શુદ્ધિનો કીધો પ્રયાસ મેં. . .                      આનંદે. . .

 

પ્રિયવાણી પ્રિયાના મુખને શોભાવતી,

આતિથ્ય પૂજાથી ઘરને દિપાવતી,

સાચા મિત્રો કીધા મનનો શણગાર મેં. . .                આનંદે. . .

 

નિજના પરસેવે લક્ષ્મીજી આરાધીયા,

સાથ સાથ વિષ્ણુના ચરણો પખાળીયા,

વૈભવને માન્યો છે ઈશનો પ્રસાદ મેં. . .                  આનંદે. . .

 

જ્ઞાનની ઉપાસના ને કલ્યાણ ચાહના,

એ રીતે થાતી શિવજીની આરાધના,

મળતું ભોજન માન્યું સાચું મિષ્ટાન્ન મેં. . .              આનંદે. . .

 

સાચા સંતો એતો ઈશ્વરનાં દૂતો,

એવાં સાધુ કેરો સથવારો કીધો,

એવો ગૃહસ્થાશ્રમ તો ધન્ય થઈ ઝૂમે. . .                 આનંદે. . .

=== ૐ ===

વૈશાખ વદ ચૌદશ, સં. ૨૦૪૨, શુક્રવાર. તા. ૬-૬-૧૯૮૬.

માન સરવર

સામાન્ય

માન સરવર હંસની પાંખો બધે ફેલાઇ ગઈ,

‘શ્વેત નગરી’ જોતજોતામાં અહીં સર્જાઈ ગઈ.

 

પુરુષ સૂક્ત મહીં કહેલો પુરુષ ત્યાં પ્રગટી રહ્યો,

હજ્જાર મસ્તક ચરણ નયનોની ઝલક દેખાઈ ગઈ.

 

વેતન વિના તન અર્પીને પૂજા કરે પૂજારીઓ,

શક્યતા કંઈ છે નહીં કહેનારની જીભ બંધ થઈ.

 

વાયુ વરુણ ને અગ્નિએ પણ ચેનચાળા ખૂબ કર્યા,

‘દાદા’ની યોગેશ્વર પ્રતિ શ્રદ્ધાની ત્યારે જીત થઈ.

 

વિદ્વાન સંતો શાસકો આશ્ચર્યથી દિગ્મૂઢ બન્યા,

ભક્તિની શક્તિ સૌ સવાલોના જવાબો દઈ ગઈ.

 

ત્રિવેણીના સંગમ તટે જ્યાં તીર્થરાજ મિલન થયું,

ત્યાં પથ પ્રદર્શક પાંડુરંગી ચેતના પ્રગટી રહી.

 

વર્ષો પછીના બીજ થઈને વૃક્ષ ત્યાં ઝૂમી રહ્યા,

એંધાણ સતયુગના જણાયાં ને નિરાશા દૂર થઈ.

 

દેશ ને વિદેશના ચિંતક વદયા એકજ સૂરે,

પાંડુરંગ જ યુગ પુરુષ છે ના હવે શંકા રહી.

=== ૐ ===

ચૈત્ર સુદ સાતમ, સં. ૨૦૪૨, બુધવાર. તા. ૧૬-૪-૧૯૮૬.

પ્રભુના શમણાં સાચા થાય.

સામાન્ય

શમણાં સાચાં થાય પ્રભુના શમણાં સાચા થાય,

‘તીર્થરાજ’ની માંહ્ય પ્રભુના શમણાં સાચા થાય.

 

ભટ્ટકુમારીલ ક્રોધે બળતો,

મૂર્તિ પૂજાનો છેદ ન સહેતો,

ઉરમાં લાગી લ્હાય; પ્રભુની આંખે જળ ઉભરાય.

 

જગના વિદ્વાનો ધનવાનો,

સંહારે એનાં અરમાનો,

આગ મહીં શેકાય; કેવું બલિદાન કે’વાય?

 

ટપ ટપ ગાજી ત્યાં ચાખડીઓ,

સંસ્કૃતિ ઉત્થાનની ઘડીઓ,

સ્વામી શંકર ધાય; હરિના ઉરમાં શાંતિ થાય.

 

કોલ ઉપાડે શંકર સ્વામી,

“તમ ઈચ્છાનો થઉં અનુગામી”

ઉજ્જડ ઉજવળ થાય; પ્રભુના શમણાં સાચા થાય.

 

ધરતીને ઘમરોળી નાખી,

સંસ્કૃતિ હરખાતી નાચી,

કુંભ મિલન ઊજવાય; પ્રભુના શમણાં સાચા થાય.

 

આજ ફરી સંસ્કૃતિ રડતી,

ભ્રાંત ધર્મ ઉધેવ કરડતી,

હરિનું મન દુભાય, શોધે પોતાનો જગ માંહ્ય.

 

પાંડુરંગ શંકર સ્વામી થઈ,

શુદ્ધ કરે એ ગંગાજળ થઈ,

પ્રસરાવે સ્વાધ્યાય; પ્રભુના શમણાં સાચા થાય.

 

માનવમાં માનવને ઘડતો,

કર્મ કુશળતા ઈશને ધરતો,

પ્રયોગ કરતો જાય; પ્રભુના શમણાં સાચા થાય.

 

તીર્થરાજ મિલનને ટાણે,

વિશ્વ સકળને નજદીક આણે,

યોગેશ્વર હરખાય; પ્રભુનાં શમણાં સાચા થાય.

    ===ૐ===

કારતક વદ બીજ, સં. ૨૦૪૨, શુક્રવાર. તા. ૨૯-૧૧-૮૫.

‘પાંડુરંગ’ નાચતો પાંડુરંગ સામે.

સામાન્ય

તીર્થરાજ મિલનને પવિત્ર ધામે,

‘પાંડુરંગ’ નાચતો પાંડુરંગ સામે.

 

માનવને માનવમાં ઈશ્વર બતાવ્યો,

મનના મરેલને જીવન સાર આપ્યો,

દૈવી વિચાર કહી દેવાને બહાને…              પાંડુરંગ…

 

કામગરા કીધાં તેં કામચોર લોકને,

કર્મનું નૈવૈદ્ય દેતા કૃષિને ઉપવને,

ભક્તિની શક્તિનું દર્શન એ પામે…          પાંડુરંગ…

 

મૂર્તિપૂજાનું સ્વરૂપ સમજાવ્યું,

સપનું કુમારિલનું સાચું ઠરાવ્યું,

આચાર્ય શંકરનું હૈયું નચાવે…                  પાંડુરંગ…

 

યાત્રા અનોખી જગતને બતાવી,

જીવને મળી શિવપૂજા કરાવી,

પાપોને બાળી પાપી વૃત્તિને ડામે…            પાંડુરંગ…

 

દીનતા નિવારી ખુમારી જગાડે,

મહેનત વિણ લેવું ના સૌને શીખવાડે,

ભાવ કેરા તંતુથી જગને એ બાંધે…            પાંડુરંગ…

    ===ૐ===

પાંડુરંગ નાચંતો “પાંડુરંગ” સામે.

સામાન્ય

ઉપવની ભૂમિના પવિત્ર ધામે,

પાંડુરંગ નાચતો “પાંડુરંગ” સામે…(૨)

 

મૂર્તિ પૂજાની વ્યાપકતા બતાવી,

“વધતી પ્રતિમા” ની ઝાંખી કરાવી,

કણ કણ માં ઈશ્વરનું દર્શન કરાવે…             પાંડુરંગ…

 

ભક્તિના સાધન તો એનાં છે નોખાં,

પાવડા તીકમ ને તગારાં અનોખાં,

લીધો તીકમ છોડી બાંસુરી કાન્હે…              પાંડુરંગ…

 

કર્મયોગી ભક્તોને પરસેવે ન્હાયો,

મનનો કુસુમહાર એણે સ્વીકાર્યો,

ઢેફાંનાં કુમકુમ શોભે છે લલાટે…                 પાંડુરંગ…

 

અર્થશાસ્ત્ર વેદોનું પીંછુ સજાવ્યું,

વિષ્ણુ ને લક્ષ્મીનું મિલન કરાવ્યું,

વૃક્ષોમાં વિષ્ણુના દર્શનને નામે…                પાંડુરંગ…

 

વ્યક્તિમાં ભક્તિની શક્તિ જગાવી,

આસક્તિ કાઢી અનાસક્તિ લાવી,

ઘડતો માનવને એ ઉપવનને સ્થાને…          પાંડુરંગ…

    ===ૐ===

જેઠ સુદ પડવો, સં. ૨૦૪૧, સોમવાર. તા. ૨૦-૫-૮૫.