Tag Archives: વિશ્વ

પ્રભુના શમણાં સાચા થાય.

સામાન્ય

શમણાં સાચાં થાય પ્રભુના શમણાં સાચા થાય,

‘તીર્થરાજ’ની માંહ્ય પ્રભુના શમણાં સાચા થાય.

 

ભટ્ટકુમારીલ ક્રોધે બળતો,

મૂર્તિ પૂજાનો છેદ ન સહેતો,

ઉરમાં લાગી લ્હાય; પ્રભુની આંખે જળ ઉભરાય.

 

જગના વિદ્વાનો ધનવાનો,

સંહારે એનાં અરમાનો,

આગ મહીં શેકાય; કેવું બલિદાન કે’વાય?

 

ટપ ટપ ગાજી ત્યાં ચાખડીઓ,

સંસ્કૃતિ ઉત્થાનની ઘડીઓ,

સ્વામી શંકર ધાય; હરિના ઉરમાં શાંતિ થાય.

 

કોલ ઉપાડે શંકર સ્વામી,

“તમ ઈચ્છાનો થઉં અનુગામી”

ઉજ્જડ ઉજવળ થાય; પ્રભુના શમણાં સાચા થાય.

 

ધરતીને ઘમરોળી નાખી,

સંસ્કૃતિ હરખાતી નાચી,

કુંભ મિલન ઊજવાય; પ્રભુના શમણાં સાચા થાય.

 

આજ ફરી સંસ્કૃતિ રડતી,

ભ્રાંત ધર્મ ઉધેવ કરડતી,

હરિનું મન દુભાય, શોધે પોતાનો જગ માંહ્ય.

 

પાંડુરંગ શંકર સ્વામી થઈ,

શુદ્ધ કરે એ ગંગાજળ થઈ,

પ્રસરાવે સ્વાધ્યાય; પ્રભુના શમણાં સાચા થાય.

 

માનવમાં માનવને ઘડતો,

કર્મ કુશળતા ઈશને ધરતો,

પ્રયોગ કરતો જાય; પ્રભુના શમણાં સાચા થાય.

 

તીર્થરાજ મિલનને ટાણે,

વિશ્વ સકળને નજદીક આણે,

યોગેશ્વર હરખાય; પ્રભુનાં શમણાં સાચા થાય.

    ===ૐ===

કારતક વદ બીજ, સં. ૨૦૪૨, શુક્રવાર. તા. ૨૯-૧૧-૮૫.

યોગેશ્વરના ચિત્તનો તું ચોર છે.

સામાન્ય

(રાગ – દાદાજીએ ઝાલી મારી આંગળી…)

 

યોગેશ્વરના ચિત્તનો તું ચોર છે,

એનાં દિલમાં તારો કલશોર છે.

 

યુગોના જાગરણ તેં’તો મટાડ્યાં,

રુદિયાનાં બોજ બધા એનાં ઊતર્યા,

તારાં સઘળાં કામે એની મહોર છે…             એનાં…

 

વૈદિક સંસ્કૃતિનું મંદિર સજાવ્યું,

વેદ કેરી વેદનાનું રુદન શમાવ્યું,

તું તો એનાં કાળજાની કોર છે…                 એનાં…

 

માનવને માનવમાં ઈશ્વર બતાવ્યો,

શક્તિનો એની ખજાનો ઊઘાડ્યો,

કામ કરતા ના ઈશનું કામચોર જે…             એનાં…

 

યોગ સમજાવવા પ્રયોગો તેં કીધા,

ત્રિકાળ સંધ્યાના નવનીત તેં દીધાં,

ઊગાર્યા જનને પાપોથી ઘોર જે…                એનાં…

 

સ્થાન તારું મોખરે છે જગના ઈતિહાસમાં,

તોરણીયા બાંધ્યાં છે સદીઓએ દ્વારમાં,

આજે પ્રગટી વિશ્વે સાચી ભોર છે…               એનાં…

=== ૐ‌===

પોષ સુદ છઠ, સં. ૨૦૪૧, શુક્રવાર. તા. ૨૮-૧૨-૧૯૮૪.

તું શ્યામ વિણ બીજો નહીં.

સામાન્ય

વિશ્વમાં યુગ કાર્ય તારું જોઈ એવું થાય છે,

તું શ્યામ વિણ બીજો નહીં એની પ્રતીતિ થાય છે.

 

આંખને મીચકારતો કહાનો બહુ મલકાય છે,

પ્રકૃતિની મહેકથી દિલ તરબતર થઈ જાય છે,

શંકા કુશંકાનાં બધાં વાદળ હવે વીખરાય છે,

તું શ્યામ વિણ બીજો નહીં એની પ્રતીતિ થાય છે.

 

ઝેરને ખંખેરતા વિષધર ભરાયા જઈ ઉરે,

સ્નેહનાં સ્થાનો વીંધાયાં નેણનાં કાતિલ તીરે,

વિલાપને આલાપમાં જ્યારે તું પલટી જાય છે,

તું શ્યામ વિણ બીજો નહીં એની પ્રતીતિ થાય છે.

 

મોતની મુઠ્ઠી મહીં જીવન સહુનાં ધ્રુજતાં,

વિયોગને મીટાવવા અદ્ભુત પ્રયોગો તેં કીધા,

નિશ્વાસને વિદાય દઈ વિશ્વાસ નચવી જાય છે,

તું શ્યામ વિણ બીજો નહીં એની પ્રતીતિ થાય છે.

 

વિદ્વાન હો કે વિત્તવાનો તું મુઠેરી છે ઉંચો,

સંસાર કે પરમાર્થની ઉકેલતો સહેજે ગૂંચો,

વિશ્વ કેરો મિત્ર ‘વિશ્વામિત્ર’ તું થઈ જાય છે,

તું શ્યામ વિણ બીજો નહીં એની પ્રતીતિ થાય છે.

 

હર યુગે હું અવતરીશ એવું વચન કૃષ્ણે દીધું,

છે તું સમીપ પણ વામણી નજરે નહીં દર્શન કીધું,

પદવી “જગદ્દગુરુ”ની તું સાચી ઠરાવી જાય છે,

તું શ્યામ વિણ બીજો નહીં એની પ્રતીતિ થાય છે.

        === ૐ ===

ભાદરવા સુદ આઠમ, સં. ૨૦૪૧, શનિવાર. તા.૨૧-૯-૮૫.

તારું હૃદય એવું ધામ.

સામાન્ય

તારું હૃદય એવું ધામ,

    જે મારી લાગણીઓનો મુકામ.

 

ઊર્મિને અંકુર જઈ બેઠો,

શોણિતમાં સરગમ થઈ પેઠો,

    મમતાળું મમ ગાન…                      જે મારી…

 

જીવન વનને ઉપવન કીધું,

મનને વૃંદાવન તેં કીધું,

    જાઉં બીજે શું કામ…                       જે મારી…

 

અંતરના અંધારાં કાપી,

શ્યામ મૂરત રુદિયામાં સ્થાપી,

    દીધું પરમ પદ ધામ…                    જે મારી…

 

પ્રભુને મુજમાં છે બહુ દૂરી,

સ્પર્શ ન સમજુ એ મજબૂરી,

    તું મારો વિશ્રામ…                         જે મારી…

 

યુગ દ્રષ્ટા તું યુગ પુરુષ તું,

જગ માનવનો માર્ગ દીપક તું,

    યુગ પરિવર્તન સ્થાન…                  જે મારી…

 

તુજને દેખી કળિયુગ કંપે,

તેથી હરિનું હૈયું જંપે,

    વિશ્વ સકળની શાન…                   જે મારી…

    ===ૐ===

અષાઢ સુદ એકાદશી(બીજી), દેવસુતી એકાદશી, સં. ૨૦૪૧, શનિવાર. તા. ૨૯-૫-૮૫.

હવે કરો આરામ.

સામાન્ય

સ્વાધ્યાયી કહી દો ‘દાદા’ને, આપ કરો વિશ્રામ;

જીવન રામને કામે ખરચ્યું, હવે કરો આરામ.

 

દુઃખ દર્દને મિત્રો કીધાં, અગવડના પ્યાલા પણ પીધા;

દેહ ધર્મની મર્યાદા ઓળંગી, કીધાં કામ…                                                       જીવન…

 

કટાક્ષના કંટક પણ વાગ્યા, અગન ક્રોધના ભડકા દાઝ્યાં;

હસતાં હસતાં સહન કર્યાં, સહુ જગનાં દુઃખ તમામ…                                         જીવન…

 

જ્ઞાની પંડિત સહુ વિરોધી બેઠાં, તમ કીર્તિ અવરોધી;

યોગેશ્વરની સહાય તમને, વિશ્વે ગાજ્યું નામ…                                                  જીવન…

 

ઋષિ દધીચિ આપ લાવ્યા છો, ઈશ કામે અસ્થિ હોમો છો;

મોટા મોટા ઈન્દ્રોના પણ, છૂટતા દોર દમામ…                                                 જીવન…

 

પાંડુરંગ છો ભાવ સમંદર, ભાવ ઝરણ સૌનાં છે અંતર;

આકર્ષી એ સઘળા સ્ત્રોતો, જગવ્યો સૌમાં રામ…                                              જીવન…

 

કર્મયોગ સૂરજ સમ કીધો, ભાવે શ્યામને બાંધી દીધો;

ઉજ્જડ ને ઉજ્વળ છે કીધું, જીવન યાત્રા ધામ…                                                જીવન…

 

પ્રભુકાર્ય આપે બહુ કીધું, ઈશ મારગનું ઘડતર કીધું;

સૂચન કરો અમને શું કરવું, નહીં થઈએ ગુમનામ…                                           જીવન…

    ===ૐ===

વૈશાખ સુદ ચૌદસ, સં. ૨૦૪૧, શુક્રવાર. તા. ૩-૫-૮૫.