ક્યાં છો પારકા કે આપનું હું સ્વાગત કરું,
નથી આવતા તમે એવું મહેણું ટળ્યું.
છંટકાવ કરતાં આનંદના ફુવારા,
હૈયામાં ઊગ્યા છે ઊર્મિના ક્યારા,
એવાં આસન પર આપનું મેં સ્થાપન કર્યું… નથી આવતા…
યાદોની ફરિયાદો બહુયે સતાવતી,
આશા પ્રતિક્ષાને દિલાસો આપતી,
પુષ્પ ઈચ્છાનું આંગણીયે મલકી રહ્યું… નથી આવતા…
સ્વાર્થના સંબંધોના બંધો રડાવતા,
લાગણીને સ્થાને માગણીઓને માંગતા,
આજ સ્નેહ અભિષેકનું છે નિર્ઝર ઝર્યું… નથી આવતા…
થાઉં હું મોરલોને ટહુકો તમે થજો,
ભમરો હું થઈ જાઉં ગુંજન તમે હજો,
મારા જીવન સંગીતનું તો ઝાંઝર બજ્યું… નથી આવતા…
ઈંતજાર તારો છે ગર્વ આજ ભાંગીયો,
પાંડુરંગ આગમનનો ઉત્સવ છે પાંગર્યો,
મને અણમોલી સ્મૃતિનું સ્વર્ગ છે મળ્યું… નથી આવતા…
===ૐ===
આસો વદ છઠ, સં. ૨૦૪૧, સોમવાર. તા. ૪-૧૧-૮૫.