Tag Archives: boat

तडप मेरे दिलकी न जाने कन्हाई।

સામાન્ય

(રાગ – મને થોડું માખણ અપાવને ઓ માવડી…)

 

 

तडप मेरे दिलकी न जाने कन्हाई।

रैन भई दिन मोहे चैन न आई…                       तडप…

 

 

असुंवनके तेल प्रेम दीप है जलाया।

ढूंढूं प्रकाशमें न देखी तेरी छाया।

यादे तेरी भुलु पर चित्तसे न जाई…                  तडप…

 

 

नैनके कलममें भ्रमर बनके आना।

स्नेहकी गलीमें तुम बंसी बजाना।

बिनती मोरी तुने क्यों ठुकराई…                      तडप…

 

 

राधाको जैसा है प्रेम तुने कीया।

रुकमनीको तुने वैसा है दिया ?

ऐसी शंका मोरे मनमें है आई…                        तडप…

 

 

पनघट पर घट भरने झटपटमें चाली।

मारी कंकरीया ओ नटवर वनमाली।

जलकी धारा तेरे पैर को भिंजाई…                   तडप…

 

 

आंसुमें जीवनकी नैया बहाई।

लेले सुकान श्याम देदे दुहाई।

हारीमें करले स्विकार ओ कन्हाई…                  तडप…

    ===ॐ===

चैत्र वद द्वादशी, सं. २०४१, मंगलवार | दि. १६-४-८५ |

મનના શણગારને જોવાની લગન મને.

સામાન્ય

(રાગ – વાણીની દેવી મા શારદા નમન તને…)

 

સૃષ્ટિનો સર્જક જોવાની લગન મને,

મનના શણગારને જોવાની લગન મને…

 

નયણાંના ઘાટ થકી નજરોની નાવ લઈ,

સૌંદર્ય મૂર્તિ નીરખવાની આશ લઈ,

ભેદી આકાશને જોવાની લગન મને…                            મનના…

 

ઝરણાંનાં ઝાંઝર ના ઝણકારે ઝુમતો,

વાયુમાં વ્હાલ થઈ હૈયાને ચુમતો,

થાવું કવન ઈશનું બસ એ લગન મને…                         મનના…

 

પર્વતને પાણીનું હૈયું તે દીધું,

માનવ જીવન જળથી લહેરાતું કીધું,

લીલાને તારી જોવાની લગન મને…                               મનના…

 

તારાની આંખોથી જગને નિહાળતો,

ચાંદામાં હાસ્ય થઈ શીતળતા આપતો,

વ્યાપક પ્રભુને જોવાની લગન મને…                             મનના…

 

જીવનના રાગ બધા છોડીને આવું,

કંઠ તણો રાગ તારા કાનમાં ધરાવું,

“પાંડુરંગ” રાગ મહીં ડૂબું લગન મને…                            મનના…

    ===ૐ===

કારતક સુદ નોમ, સં. ૨૦૪૦, બુધવાર. તા. ૧૩-૧૧-૮૩. (રંગ જયંતી મારી દિકરી જાગૃતિનો જન્મ દિવસ.)

 

(વડોદરા જીલ્લાની તીર્થયાત્રા તા. ૧૦-૧૧-૮૩ થી ૧૮-૧૧-૮૩ દરમિયાન, તા.૧૩-૧૧-૮૩ ને દિવસે રચેલું. યાત્રીકોને મળવા જતાં રસ્તામાં ઉદ્ભવેલું (પાવી) જેતપુરમાં લખ્યું.)

નવી નવેલી સવાર આવે.

સામાન્ય

મટયું તિમિરને ડુબ્યા સિતારા,

    નવી નવેલી સવાર આવે.

કળી મટીને કુસુમ ખીલતાં,

    નવી યુવાની ખુમાર લાવે.

 

અનેક મુખથી વિહંગ ગાતાં,

    નવા જીવનની ગઝલ મજાથી.

નીચે પડેલા જગતને એ તો,

    ઊંચે જવાની દિશા બતાવે.

 

પવનની મીઠી લહરીથી વૃક્ષો,

    ઉમંગથી સૌ રહ્યાં છે નાચી.

જલાવે ભડભડ ભલેને તડકા,

    વરસતી વર્ષાની ધાર આવે.

 

ન થાય નાખુશ નદી કદાપી,

    ન કોઈ એની ખબર કઢાવે.

છલકતી આનંદ એક સરખો,

    ઉરે રમાડી મજા કરાવે.

 

સવારી વીજળી ઉપર છે કીધી,

    ગડડ નગારાં ગગનમાં વાગે.

મળ્યું છે અમને ક્ષણિક આયુ,

    છતાંય મસ્તી ભરેલ જાવે.

 

અમે તો છોડી અમારી નૌકા,

    અમારે જાવું અમારે સ્થાને.

જીવન કે મૃત્યુ મહીં અમારા,

    હંસી ખુશીની બહાર આવે.

    ===ૐ===

શ્રાવણ સુદ દસમ સં. ૨૦૩૯, ગુરુવાર, તા. ૧૮-૮-૮૩.

(સ્ટુડન્ટસ યુનિયન, મ. સ. યુનિવર્સિટી, વડોદરાની ચુંટણી ટાણે પોલીંગ બુથમાં નવરાશના સમયે લખ્યું.)

વર્ષાધાર વહાવીને હરિ જીવન ધાર વહાવે.

સામાન્ય

 

(રાગ – હાથ ફર્યો કીરતાર તણો… – શિવરંજની)

 

વર્ષાધાર વહાવીને હરિ જીવન ધાર વહાવે,

શુષ્ક હૃદય સંતપ હરિને નવ અંકુર પ્રગટાવે.

 

નભને પ્રાંગણ નૃત્ય કરે ઈશ ગડગડ શબ્દ ગજાવે,

સ્નેહ નૂપુર તુટતાં જલબિંદુ રીમઝીમ શબ્દે ગાવે…             વર્ષાધાર…

 

શેરી સઘળી સરિતા જેવી ધસમસતી વહી જાયે,

એમાં કાગળની નૈયા સમ જીવન વહેતું જાયે…                 વર્ષાધાર…

 

વિદ્યુત જેવું જીવન પણ જો ક્ષણભર ચમકી જાયે,

તિમિર મહીં થઈ તેજ લીસોટો પથદર્શક થઈ જાયે…          વર્ષાધાર…

 

બચપણની મસ્તી સમ ઝુમતાં જલ તોરણ મનભાવે,

યૌવનની મોહકતા જેવી સૃષ્ટિ ખીલખીલ થાયે…              વર્ષાધાર…

 

વિશ્વ પટલ પર હરિયાળીની ચાદર ઈશ બિછાવે,

હરિયાળીમાં હર્ષ બનીને હરિતો હસતા જાયે…                  વર્ષાધાર…

 

મેઘ ધનુના રંગ લઈ જળ વસુંધરાને આપે,

પૃથ્વી વિધ વિધ રંગે ખીલતી સ્નેહ સુગંધી આપે…           વર્ષાધાર…

    ===ૐ===

શ્રાવણ વદ પાંચમ, સં. ૨૦૩૮, સોમવાર. તા. ૯-૮-૮૨.

કાગળની છે નાવ આપણી

સામાન્ય

કાગળની છે નાવ આપણી

ચાલો ફરવા જઈએ

તાસકડીના જળમાં સરતી નાવ આપણી

ચાલો સરવા જઈએ

 

એમ કરોને!  સુકાન લો તમે

ને હું પાણી ઉલેચું

સાથે સાથે રુદિયા કેરાં

ઝેર બધાંય ઉલેચું

 

હલેસાંને હાથમાં લઈને

ચાલો મારગ કરીએ

 

જલદી કરજો કાગળની આ નૈયા જો જો

કયારે જાશે ફાટી

તાસકડી તોફાન ગર્જશે

ક્યારે જાશે તૂટી

 

દિવાસળનાં હલેસાં છે

ધીમે ધીમે મથીએ

ડબક ડબક હલેસાં ને જળ

એને તાલે આગળ ધપીએ

ધપતાં ધપતાં ગાતાં જઈએ

 

હૈયા હો પડકાર કરીએ રે

સર સર સર સર વહેતો વાયુ

ફટાક પૂરું થાશે આયુ

તે પહેલાં સમજી સમજી ને

શઢને ખોલી દઈએ

 

તાસકડીના બુંધે જાશું

કદીક આપણે

ઘડી બે ઘડી મોજ મહીં પણ

આફતને જાણી લઈએ

 

ચિંતા કેવી ?

જાણીજાણી બેઠા છે સૌ

કાગળની છે નાવ આપણી

આફતને માણી લઈએ

 

તાસકડી સરજ્યા તોફાને

મોંજાએ દીધેલા તાલે

ઝટપટ નાચી લઈએ

સાથે સૌ ગાતાં જઈએ સાથે સૌ મરતાં જઈએ

===================ૐ==========================

કારતક સુદ ચૌદસ ગુરુવાર સં. ૨૦૩૪ તા. ૨૪-૧૧-૭૭