Tag Archives: desire

નથી આવતા તમે એવું મહેણું ટળ્યું.

સામાન્ય

ક્યાં છો પારકા કે આપનું હું સ્વાગત કરું,

નથી આવતા તમે એવું મહેણું ટળ્યું.

 

છંટકાવ કરતાં આનંદના ફુવારા,

હૈયામાં ઊગ્યા છે ઊર્મિના ક્યારા,

એવાં આસન પર આપનું મેં સ્થાપન કર્યું…        નથી આવતા…

 

યાદોની ફરિયાદો બહુયે સતાવતી,

આશા પ્રતિક્ષાને દિલાસો આપતી,

પુષ્પ ઈચ્છાનું આંગણીયે મલકી રહ્યું…             નથી આવતા…

 

સ્વાર્થના સંબંધોના બંધો રડાવતા,

લાગણીને સ્થાને માગણીઓને માંગતા,

આજ સ્નેહ અભિષેકનું છે નિર્ઝર ઝર્યું…            નથી આવતા…

 

થાઉં હું મોરલોને ટહુકો તમે થજો,

ભમરો હું થઈ જાઉં ગુંજન તમે હજો,

મારા જીવન સંગીતનું તો ઝાંઝર બજ્યું…          નથી આવતા…

 

ઈંતજાર તારો છે ગર્વ આજ ભાંગીયો,

પાંડુરંગ આગમનનો ઉત્સવ છે પાંગર્યો,

મને અણમોલી સ્મૃતિનું સ્વર્ગ છે મળ્યું…         નથી આવતા…

    ===ૐ===

આસો વદ છઠ, સં. ૨૦૪૧, સોમવાર. તા. ૪-૧૧-૮૫.

 

(આ ગીત પ.પૂ. દાદા ઘરે પધાર્યાં ત્યારે તા. ૭-૧૧-૮૫, ગુરુવાર આસો વદ નોમના દિવસે આશરે ૧૨:૩૦ વાગે એમની સમક્ષ રજુ કર્યું.)

શ્રી ગણેશ દેવા.

સામાન્ય

(રાગ – વાણીની દેવી મા શારદા નમન તને…)

 

આદ્યશક્તિ માતા ને પિતા મહાદેવા,

વંદું હું વારંવાર શ્રી ગણેશ દેવા.

 

જ્ઞાન અને કલ્યાણ શિવનું સ્વરૂપ છે,

સમૃદ્ધિ ઐશ્વર્ય ગૌરીનાં રૂપ છે,

એમના સપૂત તમે ધૈર્યશીલ દેવા…            વંદું…

 

વિદ્વાનોનાં પડછાયા સૌને ડરાવે,

તેથી સારા કામો કરવાં ન ફાવે,

આપનાં અભય માટે લાગે છે મેવા…           વંદું…

 

વાસનાના મૂષક ફૂંકી ફૂંકી ખાયે,

દર્દની એ પીડા પાછળથી જણાયે,

અંકુશમાં રાખી સવાર થાવ દેવા…              વંદું…

 

જીવન પ્રસાદ ધરે ઈશ્વરની સામે,

દૈવી બુદ્ધિ રિદ્ધિ સિદ્ધિને પામે,

કુરૂપ સુરૂપ થાયે સમજાવો દેવા…               વંદું…

 

અંકુશથી પાપોની વૃત્તિ દબાવજો,

પરશુથી દુર્ગુણનાં મસ્તક સંહારજો,

મોદક આનંદ રૂપ દેજો હો દેવા…                 વંદું…

    ===ૐ===

જીવન ઊર્ધ્વગામી થવાને ચહે છે.

સામાન્ય

જીવન ઊર્ધ્વગામી થવાને ચહે છે,

મટી શૂન્ય એ પૂર્ણ બનવા મથે છે.

 

ફૂટે અંકુરો થૈ’ ઘટાવૃક્ષ થાવા,

ફૂલોને ખીલવતું મધુરું હસે છે.

 

અમારી આ માટીમાં જે બીજ વાવ્યાં,

વાર્ધક્ય એનાં ફ્ળો ભેટ દે છે.

 

સંજોગના સૌ શિકારો થવાના,

સંજોગના કો શિકારી બને છે.

 

વિચારોની સાવરણી મનની ભૂમિ પર,

વિકારોના કચરાને વાળ્યા કરે છે.

 

નિરામય ધવલ નિર્મળી જિંદગાની,

તે પામવા દિલ સદાયે રુવે છે.

 

‘ચાલી’ યુવાની દઈ હાથ ’તાલી’

પડે ‘ચાસ’ મુખ પર જીવન ‘વન’ મહીં જે.

 

વરસગાંઠ ટુકડાથી ગંઠાતુ જીવન,

અમરગાંઠ કાજે તલસતું રહે છે.

 

નથી થાવું પથ્થર કે જે શીશ ફોડે,

પરમ સ્નેહ મૂર્તિ થવું ઝંખના છે.

    ===ૐ===

જેઠ સુદ ચોથ, સં. ૨૦૪૧, ગુરુવાર, તા. ૨૩-૫-૮૫.

 

૧. ‘ચાલી’ – ચાળીસ વર્ષ, ૨. ‘તાલી’ – એકતાલી (૪૧), બેંતાલી (૪૨), ૩. ‘ચાસ’ – પચાસ(૫૦), ૪. ‘વન’ – એકાવન, બાવન

तडप मेरे दिलकी न जाने कन्हाई।

સામાન્ય

(રાગ – મને થોડું માખણ અપાવને ઓ માવડી…)

 

 

तडप मेरे दिलकी न जाने कन्हाई।

रैन भई दिन मोहे चैन न आई…                       तडप…

 

 

असुंवनके तेल प्रेम दीप है जलाया।

ढूंढूं प्रकाशमें न देखी तेरी छाया।

यादे तेरी भुलु पर चित्तसे न जाई…                  तडप…

 

 

नैनके कलममें भ्रमर बनके आना।

स्नेहकी गलीमें तुम बंसी बजाना।

बिनती मोरी तुने क्यों ठुकराई…                      तडप…

 

 

राधाको जैसा है प्रेम तुने कीया।

रुकमनीको तुने वैसा है दिया ?

ऐसी शंका मोरे मनमें है आई…                        तडप…

 

 

पनघट पर घट भरने झटपटमें चाली।

मारी कंकरीया ओ नटवर वनमाली।

जलकी धारा तेरे पैर को भिंजाई…                   तडप…

 

 

आंसुमें जीवनकी नैया बहाई।

लेले सुकान श्याम देदे दुहाई।

हारीमें करले स्विकार ओ कन्हाई…                  तडप…

    ===ॐ===

चैत्र वद द्वादशी, सं. २०४१, मंगलवार | दि. १६-४-८५ |

વાઘરી પ્રભુનો થઈ ખેંચે છે શ્યામને

સામાન્ય

(हम तो चले जाते भगवन जहां बुलाते …)

 

વાર વાર ઘડી ઘડી રિઝવે છે શ્યામને,

વાઘરી પ્રભુનો થઈ ખેંચે છે શ્યામને…

 

વાત વાતમાં હરિની વાણી સમજાવતો,

ઘર ઘરમાં ઈશની કહાણી પોં’ચાડતો,

રીતભાતથી એની મોહે ઘનશ્યામને…                           વાઘરી…

 

વાઘ સમી ત્રાડ દીધી દૂષણને મારવા,

ઘર ખૂણે બેઠેલી ભક્તિ રેલાવવા,

રિપુઓને મારીને રીઝવે ભગવાનને…                           વાઘરી…

 

વાત્સલ્યે ખુદને ને જગને મહેંકાવતો,

ઘટ ઘટમાં ઈશ્વરની હાજરીને માણતો,

રિબાતાં જનમાં એ નચવતો રામને…                            વાઘરી…

 

વાસુદેવ વાસના થયો એના દિલમાં,

ઘટતો ના ભાવ એનો ઈશના ચરણમાં,

રિદ્ધિ સિદ્ધિ ગણતો પાંડુરંગ પ્રેમને…                             વાઘરી…

    ===ૐ===

મહા સુદ અગિયારસ – જયા એકાદશી, સં. ૨૦૪૧, શુક્રવાર. તા. ૧-૨-૮૫.