Tag Archives: mouth

આનંદે નાચતો નિવાસ.

સામાન્ય

ઊર્મિની ઈંટોથી સર્જ્યો આવાસ મેં,

આનંદે નાચતો કીધો નિવાસ મેં.

 

સંતાનોને સંતની મેં દિશા ચીંધી,

સંસ્કાર ઉપવીતની દીક્ષા છે દીધી,

બુદ્ધિની શુદ્ધિનો કીધો પ્રયાસ મેં. . .                      આનંદે. . .

 

પ્રિયવાણી પ્રિયાના મુખને શોભાવતી,

આતિથ્ય પૂજાથી ઘરને દિપાવતી,

સાચા મિત્રો કીધા મનનો શણગાર મેં. . .                આનંદે. . .

 

નિજના પરસેવે લક્ષ્મીજી આરાધીયા,

સાથ સાથ વિષ્ણુના ચરણો પખાળીયા,

વૈભવને માન્યો છે ઈશનો પ્રસાદ મેં. . .                  આનંદે. . .

 

જ્ઞાનની ઉપાસના ને કલ્યાણ ચાહના,

એ રીતે થાતી શિવજીની આરાધના,

મળતું ભોજન માન્યું સાચું મિષ્ટાન્ન મેં. . .              આનંદે. . .

 

સાચા સંતો એતો ઈશ્વરનાં દૂતો,

એવાં સાધુ કેરો સથવારો કીધો,

એવો ગૃહસ્થાશ્રમ તો ધન્ય થઈ ઝૂમે. . .                 આનંદે. . .

=== ૐ ===

વૈશાખ વદ ચૌદશ, સં. ૨૦૪૨, શુક્રવાર. તા. ૬-૬-૧૯૮૬.

મસ્તકમાં આવે તો તે હસ્તક થઈ જાય છે.

સામાન્ય

પુસ્તકમાં હોય એતો પાને રહી જાય છે,

મસ્તકમાં આવે તો તે હસ્તક થઈ જાય છે.

 

    છોને રાખે મોટાં થોથાં,

    તોયે ખાતો એતો ગોથાં,

મુખે રહેલું એજ સાચું કે’વાય છે…                                   પુસ્તકમાં…

 

    પાનાંમાં ચેતન ના હોયે,

    અક્ષર તોયે ક્ષર કહેવાયે,

હૈયાની ઈશ વાણીથી જીવન બદલાય છે…                       પુસ્તકમાં…

 

    પુસ્તકની માહિતી મળતી,

    તેથી અનુભૂતિ ના થાતી,

માહિતી અનુભવ થાતાં જ્ઞાની થવાય છે…                        પુસ્તક્માં…

 

    ગીતા ઉપનિષદ ને વેદો,

    સમજાવે જીવનનાં ભેદો,

મુખે કે’વાયા તેથી આજે હયાત છે…                                પુસ્તકમાં…

 

    દાદા સમજાવે છે એવું,

    રોજ બરોજે જીવવા જેવું,

પુસ્તકની વાતો તેથી સાચી સમજાય છે…                        પુસ્તકમાં…

                ===ૐ===

ફાગણ વદ બારસ, સં. ૨૦૪૦, ગુરુવાર. તા. ૨૯-૩-૮૪.

મુખથી હું બોલું ૐ नम: शिवाय|

સામાન્ય

(રાગ – તણખલું તો આખર તણખલાની તોલે…)

 

પ્રભુ આવું તારી પાસે કામના સિવાય,

મુખથી હું બોલું ૐ नम: शिवाय|

 

દેહના દરવાજે સોંપી વિભુ મેં તો ચોકીયું,

મનની ગુફામાં જઈને કીધું મેં તો ડોકીયું,

આનંદે છલકે કાયા શોકની વિદાય…                                  મુખથી…

 

પાંચ મુખ તુજને દીધા દશ દશાનનને,

તારાથી બમણું દિધું લંકા રાજનને,

તાર્યા તેં ભક્તો એણે માર્યા જગમાંય…                               મુખથી…

 

ઉત્સાહ ઉત્કર્ષ ને ઉદ્યોગ ઉમંગ,

ઉત્તેજન આપે શિવજી પાંચ મુખ અંગ,

તારે મારગ કો આવે કરે તું સહાય…                                   મુખથી…

 

વિકારો બાળી એની ભસ્મ જે લગાવે,

એની ભભૂતી શિવજી અંગે ચઢાવે,

મસ્તકની માળા શંકર કંઠે સોહાય…                                  મુખથી…

 

આધિ વ્યાધિ ઉપાધિ ત્રણે શૂળ પીડતાં,

ત્રિશૂળથી તારા શંભુ એ તો છે ભાંગતાં,

સર્જન વિસર્જન પોષણ તુજ થી સરજાય…                         મુખથી…

 

તારી અમંગલતામાં મંગલ છુપાયું,

દુનિયાનું ઝેર તારે કંઠે લપાયું,

અમૃત દઈ વિષ ને પી તું મહાદેવ થાય…                            મુખથી…

    ===ૐ===

ભાદરવા સુદ પડવો, સં. ૨૦૩૯, ગુરુવાર. તા. ૮-૯-૮૩.

(જંગલેશ્વર, પાણીગેટમાં શ્રાવણ માસની પુર્ણાહુતિ પ્રસંગે વેદસાર શિવ સ્તવ: પર આધારિત)

નવી નવેલી સવાર આવે.

સામાન્ય

મટયું તિમિરને ડુબ્યા સિતારા,

    નવી નવેલી સવાર આવે.

કળી મટીને કુસુમ ખીલતાં,

    નવી યુવાની ખુમાર લાવે.

 

અનેક મુખથી વિહંગ ગાતાં,

    નવા જીવનની ગઝલ મજાથી.

નીચે પડેલા જગતને એ તો,

    ઊંચે જવાની દિશા બતાવે.

 

પવનની મીઠી લહરીથી વૃક્ષો,

    ઉમંગથી સૌ રહ્યાં છે નાચી.

જલાવે ભડભડ ભલેને તડકા,

    વરસતી વર્ષાની ધાર આવે.

 

ન થાય નાખુશ નદી કદાપી,

    ન કોઈ એની ખબર કઢાવે.

છલકતી આનંદ એક સરખો,

    ઉરે રમાડી મજા કરાવે.

 

સવારી વીજળી ઉપર છે કીધી,

    ગડડ નગારાં ગગનમાં વાગે.

મળ્યું છે અમને ક્ષણિક આયુ,

    છતાંય મસ્તી ભરેલ જાવે.

 

અમે તો છોડી અમારી નૌકા,

    અમારે જાવું અમારે સ્થાને.

જીવન કે મૃત્યુ મહીં અમારા,

    હંસી ખુશીની બહાર આવે.

    ===ૐ===

શ્રાવણ સુદ દસમ સં. ૨૦૩૯, ગુરુવાર, તા. ૧૮-૮-૮૩.

(સ્ટુડન્ટસ યુનિયન, મ. સ. યુનિવર્સિટી, વડોદરાની ચુંટણી ટાણે પોલીંગ બુથમાં નવરાશના સમયે લખ્યું.)

પરમેશ્વરનાં નામે દિવસ પ્રગટે છે.

સામાન્ય

રોજ સવારે ગામડું આખું જાગે છે;

પરમેશ્વરનાં નામે દિવસ પ્રગટે છે.

 

ભજગોવિંદમ્ નાં સૂર બધે ગાજતાં;

સ્તોત્ર અને ગીતાનાં મુખડાં આલાપતા,

ફળીયે ફ્ળીયે ગૂંજે છે;

પ્રભાત ફેરી વાતાવરણ હરખાવે છે. . .                     પરમેશ્વરનાં. . .   

 

નાહી-ધોઈ ગ્રામજનો મંદિરમાં આવતાં;

કૃતજ્ઞતાથી પ્રભુને પોકારતાં;

હૈયાં સૌનાં હરખે છે;

એકજ પ્રભુનાં બાળ સહુયે સમજે છે. . .                   પરમેશ્વરનાં. . .

 

સૂર્ય નમસ્કાર કરી જોબન છે શોભતું;

એનાથી તનમનનું સૌદંર્ય ઓપતું;

હિંમત ને શક્તિ નચાવે છે;

વ્યસનો વિનાનું નીરોગી જીવન બનાવે છે. . .          પરમેશ્વરનાં. . .

 

નિજનાં પરસેવાની રોટી છે પામવી;

ફોગટીયા વૃત્તિને મૂળમાંથી ડામવી;

ઈશ્વરનો ભાગ સહુ આપે છે;

જડેલી વસ્તુને કોઈ ના સંઘરે છે. . .                        પરમેશ્વરનાં. . .

 

સૂતાં ને જાગતાં ન્હાતાં ને ખાતાં;

ઈશ્વર સ્મરીને એ જીવન વિતાવતાં;

દૈવી સંસ્કાર સહુ પામે છે;

એકજ પિતાનાં સંતાનો સહુ માને છે. . .                    પરમેશ્વરનાં. . .

        ===  ૐ ===

આસો સુદ સાતમ, સં. ૨૦૩૬, ગુરુવાર. તા. ૩૦-૧૦-૧૯૮૦