Tag Archives: pandurang

મને ગમે છે!

સામાન્ય

આનંદથી છલકતાં, નયનો મને ગમેછે;

કારૂણ્યથી ભરેલું, હૈયું મને ગમે છે.

 

જોઈ મેં ચાલ તારી, જે સિંહની સવારી;

ગૌરવની એ ખુમારી, તારી મને ગમે છે. . .

 

કેવું વિશાળ હૈયું! સૌને સમાવનારું;

સૌનું છતાંય મારું, એ ઘર મને ગમે છે. . .

 

પ્યાલો લીધો છે તારા “ગુરુલીલામૃતમ્”નો;

ના ઓડકાર આવે, પીવું મને ગમે છે. . .

 

ઝાંઝર બજી રહ્યાં છે, બાવનીનાં તારી;

સંકટ મિટાવી સૌનાં, ખુશીઓ બધે વહે છે. . .

 

ખેંચાય જ્યાં ભૃકુટિ, તાંડવના તાલ ઉઠતાં;

હસતાં નયન કે ખીલતી, સૃષ્ટિ મને ગમે છે. . .

 

તું કેમ બહુ ગમે છે? કારણ ન મારી પાસે;

બસ! એમ પણ ગમે છે ને તેમ પણ ગમે છે. . .

=== ૐ ===

Advertisements

પુરસ્કાર

સામાન્ય

પુરસ્કૃત થયો છે પુરસ્કાર આજે,

પ્રભુએ અપાવ્યો જે મોભાને છાજે.

 

તમે વ્યોમ ધરતીની દૂરી મીટાવી,

દિલે સ્નેહ ઉપવન ઘટાઓ ખીલાવી,

ખુમારીનો આસવ નયનમાં બિરાજે…     પુરસ્કૃત…

 

બદતર ને રોતલના ચહેરા દિપાવ્યા,

નસીબથી ડરેલાઓ પુરુષાર્થ પામ્યા,

ધરી હોંશ કરતાં પ્રભુકાર્ય આજે…           પુરસ્કૃત…

 

કૃષિને કણસલે ને ગોરસ વણોલે,

નૌકાની સંગે ને ઉપવનને ખોળે,

ભક્તિની શકતિના દુંદુભી બાજે…          પુરસ્કૃત…

 

પ્રભુથી પ્રભુકાર્ય માટે નિમાયા,

ગુણીજન ને જ્ઞાનીની નજરે સમાયા,

જગત વંદ્ય તમને પુરસ્કાર લાધે…           પુરસ્કૃત…

=== ૐ ===

ભાદરવા વદ ત્રીજ, સં. ૨૦૫૨, શનિવાર. તા. ૩૧-૮-૧૯૯૬.

અમૃતનો સાગર

સામાન્ય

તું અમૃતનો સાગર दादा,

મૃત્યુનું શું ચાલે?

સંઘર્ષોનો કરે સામનો,

વિજય અંતમાં મહાલે…

 

સંસ્કૃતિના અનિષ્ટ કાજે, શુદ્ધિ યજ્ઞ આરંભ્યો;

ધર્મ અહીં જામેલાં જાળાં, કાઢીને તું જંપ્યો,

તત્વો સમજાવ્યાં ધર્મે જે, તુજ ઈશારે ચાલે…             સંઘર્ષોનો…

 

તિરાડ ભેદ થકી જે પડતી, ભાવ ભરી તેં પૂરી;

કહ્યું સહુને જીવન યાત્રા, હરિ વિના જ અધૂરી;

વિકટ દશા હો માનવ તારી, પ્રભુ હાથ તુજ ઝાલે…     સંઘર્ષોનો…

 

તારી વાણી માંથી છલકે, ગીતાની સરવાણી;

મૃત જીવનને અમૃત દેતી, રચવા નૂતન કહાણી;

યોગેશ્વરનો સંગ કરાવે, જીવન વસંત ફાલે…               સંઘર્ષોનો…

=== ૐ ===

અષાઢ વદ નોમ, સં. ૨૦૫૧, ગુરુવાર. તા. ૨૦-૭-૧૯૯૫.

કૃતજ્ઞતા વંદન

સામાન્ય

( રાગ – કૃણવંતો વિશ્વમાર્યમ કૃણવંતો વિશ્વમાર્યમ )

 

પાડુંરગ કરાવે જગને કૃતજ્ઞતા દર્શન,

કૃતજ્ઞતા વંદન, કૃતજ્ઞતા વંદન (૨).

 

મનોભૂમિ પર કરૂણા જળમાં કમળ સમી છે ખીલતી,

સ્નેહ સંબંધે સેવા કરતાં ફોરમ થૈને રમતી,

ભાવગીતોની બજે સિતારી (૨), ગાતી મન સ્પંદન…         કૃતજ્ઞતા વંદન…

 

ક્ષણમાં ક્ષણમાં જે રક્ષણ કરતો તે ઈશ્વર ના ભૂલવો,

દુ:ખમાં દેહ મહીં પીડાતો પરમેશ્વર શેં ભૂલવો,

અજ્ઞાનીનાં નયન ઉઘાડી (૨), કરતો જ્ઞાનાંજન…             કૃતજ્ઞતા વંદન…

 

માતપિતાએ વસુંધરાના પટ પર રમતો કીધો,

લેણદેણની વાત નહીં પણ પ્રેમ પીયાલો દીધો,

માતપિતા તો દેવ ગણાયે (૨), ગાવું તે કીર્તન…                કૃતજ્ઞતા વંદન…

 

વાડ બનીને સમાજ રક્ષે તેને કાં વીસરવો?

ધર્મ સંસ્કૃતિ માતૃભૂમિ ઉપકાર હૃદયમાં ધરવો,

ઋષિ મુનિને અવતારોએ (૨), દીધું જીવન ચિંતન…         કૃતજ્ઞતા વંદન…

 

દાદાએ ગવડાવ્યું સૌને કૃતજ્ઞતાનું ગાણું,

તે ઉપકાર નહીં ભૂલાયે ભાવ ધરી હું વખાણું,

ખુદનું જીવન ખર્ચી દઈને (૨), કર્યું સ્નેહ પ્રકટન…             કૃતજ્ઞતા વંદન…

=== ૐ ===

મહા સુદ પાંચમ “વસંત પંચમી”, સં. ૨૦૫૧, શનિવાર. તા. ૪-૨-૧૯૯૫.

કૃતજ્ઞતા અભંગ

સામાન્ય

પાંડુરંગ પાંડુરંગ, ગાયે કૃતજ્ઞતા અભંગ (૨)

 

જનને તનની ખૂબ માયા,

માનવ મૂલ્યો વીસરાયાં,

માનવતાનું જોડે અંગ…             પાંડુરંગ પાંડુરંગ…

 

હૈયું સંકુચિત મારું,

રુદિયામાં “તારું મારું”,

ખીલવે હૈયે સ્નેહ સુમન…         પાંડુરંગ પાંડુરંગ…

 

સૂતાં ઊઠતા ભોજન સાથ,

વિશ્વેશ્વર રહેતા સંગાત,

સમજાવે સૌને શ્રી રંગ…            પાંડુરંગ પાંડુરંગ…

 

દો નૈવેદ્ય નિપુણતાનું,

ભક્તિનું સાચું ગાણું,

જગવે ઉરમાં ભક્તિરંગ…          પાંડુરંગ પાંડુરંગ…

 

દાદા શીખવે કૃતજ્ઞતા,

ઉર છલકતી પવિત્રતા,

નયનો વહેતા યમુના ગંગા…      પાંડુરંગ પાંડુરંગ…

 

કીધાં ઉપકારોની યાદ,

જે કરતાં થાતાં આબાદ,

યોગેશ્વર ધરતા ઉછંગ…             પાંડુરંગ પાંડુરંગ…

 

અમ સૌ દાદાના ઋણી,

લાગણીઓ ધરીયે કૂણી,

ભાવે ભીંજવે પાંડુરંગ…              પાંડુરંગ પાંડુરંગ…

=== ૐ ===

પાંડુરંગના કદમ

સામાન્ય

ચાલતાં કદમ, દોડતાં કદમ;

પાંડુરંગના જંગે પહોંચતાં કદમ.

 

સુકાયેલાં હૃદયને ભાવ વારીથી ભીંજાવતાં,

જીવનની પાનખર મહીં વસંતને નચાવતાં,

દ્વેષનું દમન, સ્નેહનાં સુમન…                  પાંડુરંગના…

 

ધર્મ માંદલો થયો ને સંસ્કાર સડી ગઈ,

સદ્ગુણોની લાશ આમ તેમ આથડી રહી,

પ્રેરણા નયન ઉત્સાહમય વદન…             પાંડુરંગના…

 

ભોગવાદ સ્નેહ ગંગને સદા ડહોળતો,

સ્વાર્થ કાજ લાગણીનો ફાયદાથી તોલતો,

મૈત્રીનું સ્મરણ પ્રેમના કિરણ…                  પાંડુરંગના…

 

રાત દિન સહુને ધ્યેય ચીંધવાને દોડતાં,

પાંગળાને સાથ લૈને કાર્યમાં પરોવતાં,

થાક વિસ્મરણ ધ્યેયનું રટણ…                  પાંડુરંગના…

=== ૐ ===

દેવદૂત આવ્યો

સામાન્ય

આવ્યો આવ્યો…    આવ્યો આવ્યો…

દેવદૂત અમૃત પીવડાવવા, આવ્યો આવ્યો…

 

રાગ દ્વેષના સર્પો કરડે,

ઈર્ષા સ્વાર્થ ભૂતાવળ કનડે (૨)

વિષ નિવારી અમૃત પાવા…             આવ્યો આવ્યો…

 

વિકારોનાં ફાલ્યા જંગલ,

યૌવનને તે લાગે મંગલ (૨)

કંટક મુખે ફૂલ ખીલવવા…                આવ્યો આવ્યો…

 

સંસ્કૃતિને બાઝ્યાં જાળાં,

ધર્મ મહીં અંધારા કાળાં (૨)

જ્ઞાન દિવાકર તિમિર મીટાવવા…    આવ્યો આવ્યો…

 

પ્રભુ સમીપથી ઊઠ્યા ઘૂંઘટ,

ઊર્મિ ગુંજે ઉરને ઘુમ્મટ (૨)

જીવ અને શિવને મિલાવવા…         આવ્યો આવ્યો…

 

યોગેશ્વર લાડીલો આવ્યો,

જન મન ભાવન પ્યારો આવ્યો (૨)

સ્નેહામૃત સૌને પીવડાવવા…         આવ્યો આવ્યો…

=== ૐ ===

જેઠ વદ સાતમ, સં. ૨૦૫૦, ગુરુવાર. તા. ૩૦-૬-૧૯૯૪.