રાહબર

ચિંતા અને ઊણપ મટે જરૂરી સૌ મળે,

છે આપની કૃપા ને તેથી કાર્ય સૌ ફળે.

 

વિશ્વની વિચિત્રતા પ્રહાર મારતી,

લાગણીય “કાગળોના પુષ્પ” લાગતી,

માંગણીના ભારથી મુજ હૈયું કળકળે…          છે…

 

સીમા છે નાની હાથની પહાડો વિશાળ કદ,

બાથ પણ ભિડાય નહીં થાઉ  હું હતપ્રભ,

આપના હુંફાળાં સ્પર્શથી દ્વિધા ટળે…            છે…

 

મુશ્કેલીઓને મારી સાથ ગાઢ છે સંબંધ,

ભટકાવતી અંધારમાં કરતી મને તે અંધ,

આપ રાહબર છો તેથી માર્ગ સૌ મળે…          છે…

 

આપની મૂરત મૂકી શ્રદ્ધાના ગોખમાં,

પ્રેરણાની શક્તિ રેલી રોમરોમમાં,

મુશ્કેલીઓય માર્ગ બને વિઘ્ન સૌ બળે…      છે…

=== ૐ ===

ચૈત્ર વદ છઠ, સં. ૨૦૫૦, શનિવાર.તા. ૩૦-૪-૧૯૯૪.